Pse i injoroi Fillkov gjykatësit dhe prokurorët për reformën?

SHKUP — Ministri i Drejtësisë, Igor Fillkov, i injoroi kërkesat e shërbimit gjyqësor dhe të prokurorive publike, të cilët javën e kaluar në debat publik kundërshtuan fuqishëm ndryshimet ligjore në Kuvend. Të punësuarit paralajmëruan ndërhyrje të drejtpërdrejtë të pushtetit ekzekutiv në punën e tyre, ndërsa gjykatat dhe prokuroritë do të mbeten pa kuadër, i cili edhe ashtu mungon.

Nga dhjetëra amendamente të opozitës, u pranuan vetëm disa. Fillkov pothuajse për çdo një përgjigjej shkurt: “nuk pratohet”. Disa i refuzoi edhe pa sqarim.

Nuk u pranua kërkesa që të punësuarit të trajtohen si nëpunës gjyqësorë, e jo si administratë shtetërore. U refuzua edhe propozimi që pagat t’u llogariten sipas pagës mesatare bruto në vend, si dhe që aktet nënligjore t’i miratojë Këshilli i Shërbimit Gjyqësor, jo ministri.

Deputetja Sonja Mirakovska nga NSDP-ja tha se kjo është “mbrojtja më e dobët e ndonjë ligji deri më tani” dhe se ministri “nuk është i aftë të bëjë asgjë”. Ndërsa Fillkov heshtte, deputetja Vesna Bendevska — të dy nga ZNAM-i — i akuzoi opozitën për vendime të mëparshme politike. Opozitarët e quajtën “avokate” të ministrit.

Presidentja Gordana Siljanovska-Davkova vlerësoi se kërkesat janë të arsyeshme. “Pa mjete financiare nuk mund të ketë gjyqësor të pavarur,” tha ajo. Sipas përfaqësuesve të gjykatave, nga 1.800 nëpunës gjyqësorë, rreth 1.550 do të bien nën kompetencë të drejtpërdrejtë të ekzekutivit, vetëm rreth 300 si pjesë e pushtetit të pavarur gjyqësor. Ata nuk përjashtuan grevën.

Kryetari i Kuvendit, Afrim Gashi, paralajmëroi se ligjet e agjendës reformuese do të vendosen në seancë plenare deri më 30 qershor. Debati në komision, me 105 amendamente të dorëzuara, u ndërpre; vazhdimi është caktuar për nesër pasdite.

Burim: Almakos
— Redaksia ZHURMA