Si po kthehet festimi i Matheus Cunhas në trendin e Botërorit?
Sulmuesi i Brazilit prezantoi një stil të ri që ngjason me rrëshqitjen mbi valë, duke fituar zemrat e tifozëve dhe fëmijëve në mbarë botën.
FILADELFIA — Botërori 2026 ka gjetur momentin e parë viral. Sulmuesi i Brazilit dhe Manchester United, Matheus Cunha, jo vetëm që udhëhoqi kombëtaren e tij drejt fitores ndaj Haitit duke shënuar dy gola në pjesën e parë, por prezantoi edhe një festim të ri.
Pas golave në ndeshjen e luajtur në Filadelfia, sulmuesi vrapoi drejt këndit të fushës për të imituar rrëshqitjen mbi valë. Kjo lëvizje e veçantë u kopjua menjëherë nga yjet e tjerë të skuadrës si Vinicius Junior dhe Lucas Paqueta.
Ky stil nuk po mbetet vetëm në stadiume, por po shndërrohet në fenomen global. Përveç rrjeteve sociale, festimi po përhapet me shpejtësi kudo në botë te fëmijët nëpër oborret e shkollave dhe fushat e futbollit.
Thjeshtësia dhe energjia pozitive po e kthejnë këtë lëvizje në simbolin e këtij kampionati. Nëse trendi vazhdon, surferët e Cunhas pritet të zëvendësojnë festimin ikonik “SIUUU” të Cristiano Ronaldos si trendi më i madh i vitit 2026.
Burim: Telegrafi
— Redaksia ZHURMA