Faton Topalli tregon për fillimet e angazhimit të tij në PKMLSHJ

Ish-veprimtari Faton Topalli ka rrëfyer për fillimet e angazhimit të tij politik në Partinë Komuniste Marksiste-Leniniste Shqiptare në Jugosllavi, duke treguar se rrugëtimi i tij kishte nisur në vitin 1978. Gjatë një interviste, ai ka bërë të ditur se kishte marrë pjesë në mbledhjen themeluese kur ishte 15 vjeç, ndërsa angazhimi i tij kishte filluar disa muaj më herët.

Topalli ka shpjeguar se ndikim në formimin e tij kishte pasur daja i tij, Abdullah Prapashtica, i cili i kishte folur për lëvizjen ilegale shqiptare dhe për figura të rezistencës kombëtare si Adem Demaçi, Sabri Novosella, Selatin Novosella dhe Xhafer Shatri. Ai ka përmendur gjithashtu se në gusht të vitit 1978 ishte angazhuar si anëtar i Komitetit Qendror të organizatës, e cila synonte që anëtarët e saj të depërtonin në institucionet e pushtetit jugosllav për të shtruar kërkesën për Republikë.