Tahiri kërkon veprime pas raportit për Dhomat e Specializuara

Institucionet e Kosovës duhet të ndërmarrin hapa pas raportit ex officio për Dhomat e Specializuara dhe Zyrën e Prokurorit të Specializuar. Thirrja vjen nga deputeti i Aleancës, Besnik Tahiri, i cili mori pjesë në tryezën e organizuar nga Avokati i Popullit, ku u prezantua raporti.

Sipas Tahirit, raporti nxjerr në pah mungesë të theksuar të mbikëqyrjes së Dhomave të Specializuara nga institucionet kushtetuese. Ai ngriti shqetësime edhe për mungesën e transparencës për zgjatjen e mandatit të Avokatit të Personit, duke thënë se nuk janë bërë të qarta procedurat dhe kriteret.

«Koha e deklaratave emocionale dhe e lavdërimeve ka kaluar», u shpreh deputeti, duke kërkuar që Kuvendi, Komisioni për Legjislacion dhe institucionet e tjera t'i shqyrtojnë gjetjet me përgjegjësi. Ai tha gjithashtu se Kuvendi ka kompetencën ta rishikojë ligjin në përputhje me standardet ndërkombëtare, nëse evidencat tregojnë se ndryshimet janë të domosdoshme.