Italia synon vendosjen e radarëve në Ballkan për siguri

Gjatë ceremonisë së dorëzimit të komandës së misionit të KFOR-it në Kosovë, ministri italian i Mbrojtjes, Guido Crosetto, u shpreh se rajoni përbën një komponent thelbësor dhe një gur themeli për sigurinë e Italisë. Ai theksoi se angazhimi italian do të vazhdojë pavarësisht nëse KFOR-i zvogëlon praninë ose operacionet e tij në Kosovë.

Duke iu referuar rreziqeve globale, ministri përmendi si shembull sulmet e ndodhura në aeroportet e Arabisë Saudite nga rebelët Huthi, duke vënë inxhinierinë dhe shpejtësinë e raketave të përdorura në pah. Sipas tij, ngjarje të tilla dëshmojnë natyrën e kërcënimeve të ardhshme dhe kërkojnë ndërtimin e një mburoje të përbashkët mbrojtëse përmes vendosjes së mundshme të radarëve për ruajtjen e vendeve mike dhe të vetë Italisë.

Ceremonia e ndërrimit të udhëheqjes së trupave të NATO-s u realizua mes gjeneralmajorit turk Ozkan Ulutash dhe gjeneralmajorit italian Roberto Vergori.