Jaço: Dhuna në protestën e Tiranës rrezikon besimin te institucionet

Ish-kreu i Dhomës Amerikane të Tregtisë, Enio Jaço, deklaroi se dhuna ndaj të rinjve gjatë protestës me pjesëmarrje masive në Tiranë përbën një shqetësim për gjithë shoqërinë, ndërsa vlerësoi se ngjarje të tilla po zbehin besimin ndaj institucioneve.

Protesta e zhvilluar në kryeqytet grumbulloi mijëra njerëz në rrugë, por u shoqërua gjithashtu me përplasje, zemërim dhe akte dhune masive. Kjo situatë nxori në pah tensione të mbartura dhe përshkallëzim të reagimeve qytetare gjatë manifestimit.

Lidhur me këto zhvillime, Jaço theksoi se përtej ngjarjeve në rrugë, shqetësimi kryesor lidhet me humbjen e respektit mes qytetarëve dhe rrezikun e normalizimit të përçarjes. Sipas tij, zëvendësimi i dialogut me përplasje po shoqërohet me humbjen e idealizmit të të rinjve, qetësisë së prindërve dhe aftësisë për të pranuar mendimet ndryshe pa u krijuar armiqësi.

Jaço paralajmëroi gjithashtu se shoqëria po përballet me humbjen e ndjeshmërisë ndaj ngjarjeve të rënda, ku rreziku më i madh mbetet kualifikimi si normale i fenomeneve që duhet të shkaktojnë tronditje.

«Nuk është vetëm ajo që po ndodh në rrugë. Është ajo që po ndodh me ne. Po humbasim besimin te institucionet, respektin për njëri-tjetrin dhe aftësinë për të menduar ndryshe pa u kthyer në armiq. Po humbasim idealizmin e të rinjve, qetësinë e prindërve dhe bindjen se e nesërmja mund të jetë më e mirë. Por mbi të gjitha, po humbasim ndjeshmërinë. Po mësohemi me zemërimin, me dhunën, me përçarjen. Me gjithçka që dikur do të na kishte tronditur. Sot Tirana pa një pjesëmarrje masive por edhe dhunë masive. Mijëra njerëz në rrugë, zemërim, përplasje dhe pamje që duhet të na shqetësojnë të gjithëve, pavarësisht se në cilën anë qëndrojmë. Pas gjithë kësaj, pyetja nuk është vetëm kush ka faj. Është çfarë mbetet nga një shoqëri kur dialogu zëvendësohet nga përplasja, kur frika bëhet pjesë e përditshmërisë dhe kur askush nuk duket më i gatshëm të dëgjojë tjetrin. Dhe kjo është ndoshta më e trishta. Një shoqëri nuk rrënohet vetëm kur njerëzit përplasen. Rrënohet edhe kur fillojnë ta konsiderojnë normale atë që duhet t’i tronditë. Sepse tragjedia nuk është vetëm dhuna që pamë sot në Tiranë. Është rreziku që nesër të mos na tronditë më», u shpreh ai.