Sa pacientë janë regjistruar me gastroenterokolit në Gostivar?

GOSTIVAR — Ministria e Shëndetësisë njofton se deri më tani janë regjistruar gjithsej 1.554 pacientë në Spitalin e Përgjithshëm të Gostivarit dhe 1.392 pacientë në Qendrën Shëndetësore, të cilët kanë kërkuar ndihmë mjekësore për shkak të simptomave të gastroenterokolitit. Katër pacientët që ishin të shtruar në spital janë liruar dhe kanë vazhduar trajtimin në kushte shtëpie.

Të dhënat e fundit tregojnë një rënie fillestare të numrit të pacientëve të rinj. Më 19 korrik në spital dhe në qendrën shëndetësore janë evidentuar gjithsej 564 pacientë të sapoekzaminuar, shifër më e ulët krahasuar me 649 pacientë të rinj të regjistruar ditën paraprake, kur u shënua numri më i lartë brenda një dite.

Ministria bën të ditur se deri tani janë paraqitur 140 raportime zyrtare, të cilat po shqyrtohen nga ekipet epidemiologjike të Qendrës së Shëndetit Publik në Tetovë dhe Institutit të Shëndetit Publik. Janë realizuar edhe 81 anketa epidemiologjike për shkaqet dhe përhapjen e rasteve. Sipas MSH-së, gjendja klinike e shumicës së pacientëve mbetet e lehtë.

Autoritetet shëndetësore bëjnë apel që qytetarët të vazhdojnë të respektojnë rekomandimet për higjienë dhe sigurinë ushqimore. Ekipet përgjegjëse do të vijojnë monitorimin e situatës në terren, ndërsa po zbatohen të gjitha masat e nevojshme epidemiologjike, laboratorike dhe parandaluese për kontrollin e situatës.

Burimet: Shenja, Bota Sot, Almakos, Telegrafi
— Redaksia ZHURMA