Enzo Maresca: Nuk do ta kopjojë Pep Guardiolën te City

MANCHESTER — Trajneri i sapoemëruar i Manchester Cityt, Enzo Maresca, ka hedhur poshtë me vendosmëri pretendimet se do të kopjojë filozofinë taktike të Pep Guardiolës në "Etihad". Gjatë prezantimit të tij zyrtar, 46-vjeçari italian pranoi se largimi i trajnerëve legjendarë shpesh ka sjellë periudha të vështira për klubet, duke premtuar se do të mësojë nga ajo që ndodhi te Manchester Unitedi pas Sir Alex Fergusonit dhe te Arsenali pas Arsène Wengerit, për të ndërtuar identitetin e tij te City.

Hija e Guardiolës ishte e pashmangshme në konferencën e parë për shtyp të Marescës si trajner i Manchester Cityt. Italiani nuk është një fytyrë e panjohur për klubin, pasi më parë drejtoi ekipin U23 dhe më pas punoi si ndihmëstrajner i Guardiolës në sezonin historik 2022/23, kur City fitoi tripletën.

Kjo lidhje me klubin u reflektua edhe nga pankarta "Mirë se u ktheve, Enzo", që e priti në ceremoninë e prezantimit. Megjithatë, edhe pse e përshkroi rikthimin si "kthim në shtëpi", Maresca e bëri të qartë se nuk synon të jetë një kopje e Guardiolës.

Maresca zbuloi se vazhdon të ketë një marrëdhënie shumë të ngushtë me Guardiolën dhe madje kaloi kohë me të edhe më herët gjatë javës. Por ai theksoi se ka filozofinë e tij të futbollit. "Mund të ketë disa koncepte të ngjashme, por çdo trajner është i ndryshëm. Nuk besoj se ekzistojnë trajnerë që mund të kopjojnë dhe ngjisin punën e dikujt tjetër, është shumë e vështirë.

Unë nuk e shoh futbollin në të njëjtën mënyrë dhe për këtë arsye nuk besoj te modeli 'copy-paste'", deklaroi Maresca. Trajneri i ri i Cityt tregoi se është plotësisht i vetëdijshëm për sfidën që e pret pas largimit të një trajneri që ka dominuar një epokë të tërë.

Ai përmendi në mënyrë të drejtpërdrejtë vështirësitë që përjetoi Manchester United pas largimit të Sir Alex Fergusonit, si dhe periudhën e tranzicionit të Arsenalit pas Arsène Wengerit. Në vend që të frikësohej nga ky precedent historik, Maresca e cilësoi këtë si sfidën më të madhe dhe privilegjin më të madh të karrierës së tij.

"Kur një trajner qëndron për shumë vite në një klub, pas largimit të tij gjithmonë ka vështirësi. Kjo ndodhi pas Sir Alexit, ndodhi edhe pas Arsène Wengerit. Por në të njëjtën kohë, është një sfidë për të bërë gjërat si duhet menjëherë për këtë klub, për tifozët dhe për të gjithë", tha ai.

I pyetur se çfarë e bën të besojë se mund të shmangë gabimet e paraardhësve në raste të ngjashme, Maresca theksoi se besimi i tij buron nga struktura e Manchester Cityt dhe jo vetëm nga aftësitë e tij si trajner. "Mendoj se organizimi është gjëja më e rëndësishme. Ky klub, kjo organizatë, ka pasur vetëm tre trajnerë në 17 vite. Kjo nuk është normale dhe nuk ndodh shpesh", shtoi ai.

Ai shtoi se pikërisht ky stabilitet ka qenë baza e suksesit të Manchester Cityt gjatë një dekade e gjysmë dhe se synimi i tij është të vazhdojë mbi këtë themel. "Ky është ndoshta një nga arsyet pse jam i bindur se mund të bëjmë një punë shumë të mirë dhe të vazhdojmë rrugën që është ndërtuar gjatë 14-15 viteve të fundit, duke filluar nga Roberto Mancini, më pas Manuel Pellegrini dhe, siç thatë edhe ju, për dhjetë vjet me Pep Guardiolën", e mbylli ai.

Burim: Gazeta Express
— Redaksia ZHURMA