Emigrantët në Bari refuzojnë tragetin për Durrës — s'punon kondicioneri
Dhjetëra udhëtarë u përplasën verbalisht me ekuipazhin në portin e Barit pasi temperaturat brenda anijes pa kondicionim funksional ishin të padurueshme.
BARI — Pasagjerët e linjës Bari-Durrës kanë refuzuar të hipin në traget ditën e shtunë, duke denoncuar se sistemi i kondicionimit nuk funksiononte. Emigrantët shqiptarë që po ktheheshin në atdhe për pushime u përballën me temperatura jashtëzakonisht të larta brenda anijes përpara nisjes.
Udhëtarët kanë kërkuar sqarime nga stafi i anijes, por pretendojnë se përgjigjja që morën ishte: "Po doni hipni, po doni jo." Kjo ka sjellë përplasje verbale mes dy palëve në portin e Barit, duke bërë që shumë prej tyre të refuzojnë udhëtimin pa u zgjidhur problemi.
Ky është denoncimi i dytë i publikuar së fundmi nga JOQ për të njëjtin problem në këtë traget. Pasagjerët ankohen se në mungesë të alternativave reale në linjat detare, shpesh detyrohen të pranojnë kushte degraduese të udhëtimit, pavarësisht se paguajnë biletat me çmime të plota.
Udhëtarët kërkojnë që trageti të mos niset pa u siguruar ajri i kondicionuar brenda kabinave. Ata theksojnë se udhëtimi në temperatura përvëluese pa asnjë shërbim minimal është i papranueshëm për familjet dhe fëmijët që po kthehen në shtëpi.
Burim: Shekulli
— Redaksia ZHURMA
