Sa paguajnë emigrantët për kalimin ilegalisht me jahte në Britani?

LONDËR — Emigrantët po paguajnë 15.500 paund për një vend në jahte luksoze që i kalojnë ilegalisht drejt Britanisë, sipas një hetimi të gazetës britanike The Sun. Gazetarët u infiltruan në rrjetin kriminal shqiptaro-britanik duke u paraqitur si një shtetas shqiptar i deportuar më parë nga Britania, pasi kishte vuajtur dënimin në burgun Wandsworth të Londrës.

Kontakti fillestar u bë në TikTok, ndërsa bisedat u zhvendosën më pas te WhatsApp. Aty, personat e dyshuar i ofruan gazetarit një vend në një jaht me tre kabina luksoze, me jo më shumë se dhjetë pasagjerë dhe ekuipazh shqiptar, që do të nisej nga Holanda drejt zonës pranë Doverit.

Pagesa duhej kryer në Shqipëri përpara nisjes, ndërsa pas mbërritjes pranë Doverit emigrantët do të transportoheshin me automjete drejt Londrës. Një prej personave të përfshirë pretendoi se kishte vuajtur dënim në Britani për trafik droge dhe se ishte deportuar më parë.

Sipas The Sun, grupi kishte organizuar më parë udhëtime të ngjashme, ndërsa për këtë aktivitet ishte marrë me qira një jaht për rreth 50 mijë euro. Gazeta e lidh rastin me një fenomen më të gjerë të rikthimit në Britani të personave të deportuar më parë.

Duke cituar të dhëna zyrtare, The Sun shkruan se gjatë pesë viteve të fundit 4.614 persona janë rikthyer në Mbretërinë e Bashkuar pasi ishin dëbuar më parë, ndërsa mbi një e treta e tyre ishin shtetas shqiptarë.

Investigimi përmend edhe raste të mëparshme të goditura nga autoritetet: në maj, pesë persona u arrestuan pasi një jaht me shtatë emigrantë u ndalua në brigjet jugore të Anglisë; në mars, dy shtetas ukrainas u dënuan me burg pasi organizuan transportimin e pesë shqiptarëve dhe një vajze vietnameze me jaht, kundrejt 13 mijë paundësh për person.

Pas publikimit të gjetjeve, The Sun njoftoi se ia ka referuar rastin platformës TikTok, e cila mbylli brenda një ore llogarinë e raportuar, duke e cilësuar atë shkelje të rregullave kundër trafikimit të qenieve njerëzore. Dosja i dorëzohet edhe Agjencisë Kombëtare Britanike të Krimit (NCA); autoritetet britanike nuk kanë dhënë deri tani një reagim zyrtar për pretendimet e ngritura.

Burim: Top Channel
— Redaksia ZHURMA