Ekspertët tregojnë rregullat për ngrohjen me kondicioner gjatë dimrit

Ekspertët e energjisë dhe teknikët e servisimit tregojnë rregullat kryesore se si duhet përdorur kondicioneri gjatë dimrit në mënyrë të sigurt dhe ekonomike. Vendosja e temperaturës në 20 deri në 22 gradë është balanca ideale, pasi çdo shkallë mbi këtë nivel rrit konsumin e rrymës me 6% deri në 8%.

Përdorimi jo i drejtë i pajisjes me ardhjen e stinës së ftohtë jo vetëm që rrit faturën e energjisë elektrike në shtëpi e zyra, por edhe dëmton aparaturën si dhe ndikon negativisht në rrugët e frymëmarrjes. Një nga gabimet më të shpeshta është vendosja e termostatit në 28 apo 30 gradë, çka detyron kompresorin të punojë pa ndërprerje me ngarkesë të plotë, pasi ajri nxirret me të njëjtën temperaturë.

Ekspertët këshillojnë se gjatë ditës në sallon ose dhomën e ditës duhet mbajtur temperatura 20-22 gradë, ndërsa gjatë natës në dhomën e gjumit rekomandohet niveli 17-19 gradë. Po ashtu, fletët e kondicionerit duhet të drejtohen teposhtë drejt dyshemesë gjatë dimrit, sepse ajri i ngrohtë ngjitet natyrshëm drejt tavanit. Për pajisjet e teknologjisë Inverter, është më ekonomike të lihen në punë vazhdimisht në një temperaturë stabile se sa të ndizen e të fiken disa herë.

Gjatë procesit automatik të shkrirjes prej 5 deri në 10 minuta, ekspertët udhëzojnë që pajisja të mos fikohet. Filtrat e njësisë së brendshme duhet të pastrohen me ujë të vakët çdo 2 deri në 3 javë për të parandaluar bllokimin nga pluhuri, ndërsa dritaret duhet të hapen për 5 deri në 10 minuta çdo ditë për ajrosje. Për mbrojtjen e rrugëve të frymëmarrjes dhe shmangien e dhimbjeve të kokës, syve apo ajrit të thatë, rekomandohet ruajtja e lagështisë optimale prej 40% deri në 60% me anë të një lagështuesi ajri ose ene me ujë.