Rama përsërit ftesën për dialog te Kryeministria ndërsa protestat vijojnë

Kryeministri Edi Rama ka përsëritur ftesën për dialog drejtuar studentëve dhe pedagogëve, duke shprehur gatishmërinë e qeverisë për të shqyrtuar propozimet e tyre dhe për të adresuar shqetësimet e ngritura. Në pamjet e shpërndara në rrjetet sociale nga sofra e gurtë e vendosur para godinës së Kryeministrisë shfaqet mbishkrimi «Dialog», teksa qeveria po përgatit një paketë masash për t’iu përgjigjur nevojave të tyre.

Ndërkohë, protestuesit e kanë refuzuar sërish ftesën duke kërkuar dorëheqjen e kryeministrit dhe duke paralajmëruar vijimin e protestave, të cilat u shoqëruan me përplasje dhe pjesëmarrjen e deputetëve të Partisë Demokratike. Deputeti Erald Kapri ka deklaruar se policia ka përdorur forcë dhe ka kryer shkelje të lirive kushtetuese të qytetarëve, kurse kryetari i Partisë Demokratike, Sali Berisha, ka akuzuar autoritetet për dhunë të falangave shtetërore.