BIA akuzohet se përgjonte prokurorët që hetonin tragjedinë në Novi Sad

Agjencia serbe e Inteligjencës dhe Sigurisë (BIA) dyshohet se ka përgjuar në mënyrë të paligjshme prokurorë të Prokurorisë për Krim të Organizuar, përfshirë drejtuesin e saj, Mladen Nenadiq.

Sipas të dhënave nga investigimi, BIA kishte përgjuar telefonat e disa prokurorëve dhe kishte përcjellë komunikimet e tyre elektronike, duke siguruar informacione për planet dhe takimet e institucionit. Një burim anonim ka deklaruar se përmes pajisjeve të përgjuara janë monitoruar edhe mbledhjet brenda ambienteve të prokurorisë, duke përfshirë dëgjimin e prokurorëve të tjerë që ndodheshin në të njëjtat hapësira. Masat e mbikëqyrjes ishin vendosur në data të ndryshme gjatë vitit 2026, përkatësisht më 9 prill, 30 prill, 29 maj, 19 qershor dhe 7 tetor, ndërsa drejtori i BIA-s, Vladimir Orliq, kishte iniciuar ndërprerjen e tyre më 29 tetor.

Zbulimet për këto përgjime vijnë pas një tjetër rasti të ngjashëm në Fakultetin Juridik të Universitetit të Beogradit, ku ishin gjetur pajisje të dyshuara regjistrimi. Rektori i Universitetit të Beogradit, Vladan Gjokiq, ka kërkuar një hetim të plotë për të sqaruar rrethanat dhe për të identifikuar personat përgjegjës për këto pajisje në hapësirat universitare.