Blakaj: Paqartësi për mandatin e grupit punues për mbrojtjen në Hagë

Bekim Blakaj nga Fondi për të Drejtën Humanitare ka shprehur paqartësi lidhur me mandatin dhe kompetencat e grupit punues, detyra e të cilit është hartimi i strategjisë për mbështetjen e ekipeve mbrojtëse të të akuzuarve në Dhomat e Specializuara të Kosovës në Hagë. Gjatë një paraqitjeje në emisionin “Info Magazine”, ai ka vlerësuar se mbrojtësit e të akuzuarve janë palë para gjykatës dhe se problemi kryesor mbetet mungesa e mjeteve të mjaftueshme financiare.

«Nuk e dimë ende se cili është mandati i saktë i këtij grupi punues për hartimin e strategjisë,» ka deklaruar Blakaj, duke shtuar se nuk dihet se si mund të ndihmojë ky grup apo nëse ka kompetenca për të ndikuar në koordinimin e ekipeve mbrojtëse. Ai ka rikujtuar gjithashtu se gjatë procedurave ka pasur raste kur avokatët janë tërhequr dhe janë zëvendësuar, gjë që sipas tij ka dobësuar mbrojtjen e të akuzuarve.