Drama familjare në Bestrovë: 40-vjeçari flet për sigurinë e vajzave

VLORË — Një 40-vjeçar nga fshati Bestrovë i Vlorës i është drejtuar redaksisë për të kërkuar ndihmë lidhur me gjendjen e katër fëmijëve të tij, ku veçanërisht dy vajzat e mitura 14 dhe 12 vjeçe ndodhen në një situatë alarmante pas ndarjes së prindërve dhe akuzave të ndërsjella për dhunë.

Sipas burimeve, ngjarja në Vlorë vjen pas një martese rreth 18-vjeçare që u përkeqësua pasi bashkëshorti pretendon se zbuloi një tradhti bashkëshortore. Konfliktet e çiftit u shoqëruan me dhunë, kërcënime dhe përplasje, duke kulmuar me largimin e burrit nga banesa dhe lënien e katër fëmijëve në mes të situatës.

Babi i fëmijëve, i identifikuar si Haruni, pretendon se dy vajzat e mëdha kanë dalë jashtë kontrollit prindëror duke kaluar netët jashtë shtëpisë, duke konsumuar cigare dhe duke mos frekuentuar rregullisht shkollën. Për të mbështetur pretendimet e tij, ai ka vënë në dispozicion komunikime me mësuesen kujdestare për mungesat e vajzës, si dhe biseda të vajzave me nënën dhe partnerin e ri të saj, ku ky i fundit sipas tij përdor gjuhë kërcënuese. Një shqetësim tjetër i ngritur nga Haruni lidhet me komunikimin e vajzës 14-vjeçare me një burrë rreth 40 vjeç të quajtur Marjusi, i cili i kërkonte fotografi dhe i propozonte takime. Pasi ka kontrolluar telefonin dhe është përballur me personin, situata ka marrë tjetër rrjedhë pasi bashkëshortja dhe vajza e kanë dërguar në komisariat, duke e akuzuar për dhunë ndaj së miturës dhe marrjen e telefonit. Haruni i mohon kategorikisht këto akuza dhe pretendon se denoncimi u përdor për ta larguar nga fëmijët.