Dogana ndërmerr masa ligjore pas zbulimit të mallrave të padeklaruara
Procedurat administrative kanë nisur ndaj drejtuesit të një kamioni që nuk kishte paraqitur ngarkesën për import.
Redaksia ZHURMA · · Përditësuar · 1 min lexim
Gjatë kontrolleve në hyrje të territorit të Republikës së Kosovës, autoritetet kanë parandaluar një rast të kontrabandimit. Një kamioni i është nënshtruar një kontrolli shtesë nga zyrtari doganor në Pikën e Kalimit Kufitar në Vërmicë, pasi fillimisht ishte paraqitur për të kryer procedurat e rregullta të importit të mallrave të deklaruara, sipas njoftimit zyrtar.
Gjatë verifikimit të ngarkesës, autoritetet kanë konstatuar praninë e produkteve që nuk ishin paraqitur për deklarim nga drejtuesi i mjetit. Dogana e Kosovës ka bërë të ditur se ky veprim përbën shkelje të dispozitave të Kodit Doganor dhe të Akcizave, ndërsa veprimet dhe procedurat administrative janë duke vazhduar në përputhje me legjislacionin në fuqi.
