Dogana e Kosovës kërkon deklarim për mallra mbi 430 euro në Aeroportin e Prishtinës

PRISHTINË — Dogana e Kosovës ka bërë thirrje udhëtarëve që hyjnë në vend përmes Aeroportit Ndërkombëtar të Prishtinës të respektojnë procedurat doganore dhe të deklarojnë mallrat që tejkalojnë kufirin e lejuar. Puna e përditshme e zyrtarëve doganorë përfshin informimin e udhëtarëve, kontrollin e bagazheve dhe zbatimin e procedurave me qëllim parandalimin e shkeljeve dhe mbrojtjen e interesave ekonomike. Udhëtarët që kalojnë përmes kanalit të gjelbër, duke deklaruar se nuk kanë mallra për të deklaruar, mund të nënshtrohen kontrollleve doganore, ku zyrtarët përdorin edhe skanerin për identifikimin e mallrave. Dogana rikujton se kufiri i patatueshëm për mallra personale është 430 euro për udhëtar. Në rast se vlera tejkalon këtë kufi, mallrat duhet të deklarohen në kanalin e kuq, ku zyrtari doganor informon për procedurat e mëtejshme. Dogana e Kosovës mbetet e përkushtuar në mbrojtjen e interesave të qytetarëve, ruajtjen e ekonomisë dhe luftimin e kontrabandës.