Detyrimet: 67% e bizneseve përfitojnë faljen 100% të kamatave

Rreth 67 për qind e bizneseve që kanë lidhur aktmarrëveshje me OSHEE Group për shlyerjen e detyrimeve të prapambetura kanë zgjedhur t'i likuidojnë ato me një këst të vetëm, duke përfituar faljen e plotë të kamatëvonesave. Sipas të dhënave zyrtare, deri në tetor 2026 janë nënshkruar 5,762 aktmarrëveshje me Furnizuesin e Shërbimit Universal, ndërsa 789 biznese kanë përfituar reduktim të kamatëvonesave.

Marrëveshjet mbulojnë detyrimet e prapambetura të krijuara deri më 31 dhjetor 2024, ndërsa numri i klientëve privatë që kanë zgjedhur shlyerjen e detyrimit me një këst është rritur me 20% krahasuar me periudhën deri në gusht të këtij viti. Burime nga OSHEE bënë të ditur se ky zhvillim është ndikuar nga lehtësimi i aksesit të abonentëve në platformat digjitale të kompanisë nëpërmjet aplikacionit OSHEE Mobile dhe faqes zyrtare. Skema e aktmarrëveshjeve me OSHEE-në parashikon pagesën e menjëhershme ose pagesën me këste, ku klientët familjarë përfitojnë reduktim prej 70% të kamatëvonesave dhe klientët jofamiljarë përfitojnë një ulje prej 50 për qind.

Lehtësia më e madhe u takon bizneseve të vogla që përfitojnë faljen 100% të kamatëvonesave kur likuidojnë të gjithë detyrimin me një pagesë të vetme, duke shmangur kështu kostot shtesë. Për disa kategori në kushte të veçanta ekonomike dhe sociale, si familjet që trajtohen me ndihmë ekonomike, pensionistët kryefamiljarë dhe personat me status të veçantë, lehtësitë shtrihen edhe mbi detyrimet e krijuara gjatë vitit 2025. Për këta abonentë është përcaktuar një këst minimal prej 1,200 lekësh në muaj, ndërsa shlyerja mund të shtrihet deri në 240 këste, me kusht që të mos krijohen detyrime të reja të papaguara gjatë vitit 2026. Ndërkohë, për klientët buxhetorë, jobuxhetorë dhe bizneset, afatet e shlyerjes janë caktuar nga 24 deri në 120 këste në varësi të vlerës së detyrimit. OSHEE Group ka miratuar gjithashtu një skemë të posaçme për faturat korrektive, përmbledhëse dhe sistemuese, përfshirë rastet e demontimit apo testimit të matësve dhe energjisë së akumuluar, ku klientët mund t'i shlyejnë detyrimet deri në 24 këste ose të përfitojnë reduktim të kamatëvonesave përmes likuidimit të menjëhershëm.