Dëmtohet pllaka përkujtimore e Mehmet Pashë Derallës në Tetovë
Kush qëndron pas sulmit ndaj pllakës, pas vendimit të Gjykatës Kushtetuese që anuloi emërtimin e rrugës me emrin e gjeneralit?
TETOVË — Pllaka përkujtimore kushtuar gjeneralit Mehmet Pashë Derallës u dëmtua në qytet. Ngjarja vjen vetëm disa javë pasi Gjykata Kushtetuese abrogoi vendimin e Komunës për emërtimin e rrugës me emrin e gjeneralit.
Mehmet Pashë Deralla ishte gjeneral i Ushtrisë Osmane dhe ministri i parë i Luftës në Qeverinë e Ismail Qemalit pas Pavarësisë së 1912. Për shqiptarët e Tetovës dhe trojeve shqiptare, ai mbetet simbol i sakrificës, shtetformimit dhe identitetit kombëtar.
Dëmtimi i pllakës ngjall pyetje serioze për komunitetin: mos kemi të bëjmë me akt vandalizmi të rastësishëm apo me sulm të qëllimshëm ndaj simbolikës historike shqiptare? Qytetarët e Tetovës kërkojnë zbardhjen e autorëve dhe mbrojtjen e monumenteve dhe simboleve historike.
Ngjarja pritet të nxisë reagime të forta nga institucionet, subjektet politike dhe shoqatat kulturore shqiptare. Ajo sjell në qendër të debatit pyetjen se kush ka interes ta sfidojë emrin dhe figurën e gjeneralit Mehmet Pashë Derallës në Tetovë.
Burim: Tetova Sot
— Redaksia ZHURMA
