Dehari thërret seancën konstituive më 9 shtator pas marrëveshjes VV-LDK

Kryesuesi i seancës konstituive të Kuvendit të Kosovës, Avni Dehari, ka njoftuar se vazhdimi i seancës do të mbahet më 9 shtator, në orën 11:00. Vendimi u mor pas arritjes së marrëveshjes mes Lëvizjes Vetëvendosje dhe Lidhjes Demokratike të Kosovës për kandidatin për president, Bekim Sejdiu.

Dehari tha se ende nuk ka qartësi të plotë nëse ekziston numri i nevojshëm i deputetëve për konstituimin e të gjitha institucioneve, por shprehu shpresën se deri atëherë deputetët do të tregojnë gatishmëri për të përmbushur detyrimet e tyre kushtetuese. Ai theksoi se Kosova nuk ka nevojë për zvarritje të mëtejshme apo për një proces të ri zgjedhor.

Marrëveshja mes LVV-së dhe LDK-së për kandidatin e përbashkët për president nuk është përkrahur nga gjashtë deputetë të LDK-së, pa votat e të cilëve Sejdiu nuk mund të zgjidhet. Afati kushtetues për konstituimin e Kuvendit kishte përfunduar më 7 gusht.