Çfarë kërkon Daniel Serwer nga politikanët e Kosovës?

— Profesori amerikan Daniel Serwer ka bërë thirrje të prerë drejtuar klasës politike në Kosovë për të kapërcyer bllokadën institucionale. Në një intervistë për Ekonomia Online, ai deklaroi se prioriteti absolut aktual është që politikanët të fillojnë punën dhe të formojnë Qeverinë, pavarësisht vështirësive që kanë shoqëruar procesin.

Serwer vlerëson se Kosova ka pasur një vit të vështirë, duke vënë theksin te dështimi për të zgjedhur presidentin. Sipas tij, ky gjendje ka dëmtuar imazhin e stabilitetit të institucioneve, pasi është e vështirë të transmetohet një imazh i qëndrueshmërisë kur vendi nuk arrin të formojë një qeveri funksionale.

Ai shpjegoi se vështirësitë rrjedhin nga vetë natyra e sistemit parlamentar, ku presidenti zgjidhet nga Parlamenti dhe jo drejtpërdrejt nga qytetarët. Serwer theksoi se ndonëse tilla momente krizash nuk janë të pazakonta në sisteme të ngjashme, në rastin e Kosovës tre palë zgjedhje kanë çuar në situatën aktuale.

Për të zgjidhur krizën, profesori amerikan thekson se kompromiset do të jenë të domosdoshme. Ai beson se njerëzit do të duhet të qeverisin së bashku në një mënyrë më të gjerë se në të kaluarën, një proces që e konsideron të realizueshëm, me shpresën që këtë herë procesi i formimit të institucioneve të ketë sukses.

Lidhur me gazin amerikan, Serwer deklaroi se nuk është i informuar në detaje për projektin, por pranon se kostoja mund të jetë tepër e lartë. Megjithatë, ai theksoi se nga këndvështrimi mjedisor, gazi është opsion shumë më i mirë se linjiti për njerëzit.

Ai u referua kësaj çështjeje si një dilemë mes kostos dhe politikës, duke shtuar se do të dëshironte që Kosova ta përdorte gazin amerikan nëse është i dobishëm, por pa dhënë një vlerësim përfundimtar përse nuk e ka studiuar projektin në hollësi.

Në mbyllje, Serwer u referua marrëdhënieve me Shtetet e Bashkuara, duke deklaruar se pavarësisht ndryshimeve të shpeshta të qeverive në Prishtinë gjatë viteve, miqësia dhe lidhja thelbësore ndaj SHBA-së mbetet e njëjtë dhe e pandryshuar.

Burim: Lajmi.net
— Redaksia ZHURMA