Conde Nast Traveler: Shqipëria, destinacion i mikpritjes e luksit
Faqja e njohur turistike shkruan se vendi po shndërrohet në një destinacion ku mikpritja takohet me natyrën, traditën dhe luksin.
Faqja e njohur turistike "Conde Nast Traveler" ka shkruar se Shqipëria po shndërrohet në një destinacion ku mikpritja takohet me natyrën, traditën dhe luksin. Sipas këtij publikimi, vizitorët që kanë vizituar vendin shpesh përmendin ngrohtësinë e njerëzve si një arsye që e bën këtë vend të paharrueshëm.
Artikulli vë në dukje se përveç peizazheve mahnitëse, lumenjve kristalorë, majave të mbuluara me dëborë, bregdetit të kaltër të Jonit dhe trashëgimisë kulturore, janë shqiptarët, mirësia dhe mikpritja e tyre e njohur ato që i japin një vizite në vend një dimension të veçantë.
Publikimi kujton se për dekada Shqipëria mbeti e izoluar nga bota e jashtme nën regjimin komunist të drejtuar nga diktatori Enver Hoxha. Gjatë asaj periudhe, feja ishte e ndaluar, prona private u shtetëzua dhe lëvizja përtej kufijve ishte pothuajse e pamundur. Gjurmët e asaj periudhe mbeten të pranishme edhe sot, veçanërisht përmes mijëra bunkerëve prej betoni.
Megjithatë, sipas "Conde Nast Traveler", Shqipëria e sotme po përjeton një transformim të dukshëm.