Çfarë projekte filmike do të prezantohen në Forumin e Filmit të Shkurtër të DokuFest?

PRIZREN — Redaksia ZHURMA — Festivali ndërkombëtar i filmit dokumentar dhe të shkurtër “DokuFest”, i cili këtë vit shënon çerekshekullorin dhe ka mbetur edhe 36 ditë deri te hapja e edicionit të 25-të, ka përzgjedhur dhjetë projekte filmike për Forumin e Filmit të Shkurtër. Ky forum, që vitin e kaluar u bë shtyllë e fuqishme në promovimin e talenteve të reja, ofron mentorim profesional, mundësi bashkëpunimi dhe prezantimi para industrisë.

Nga 48 aplikime të pranuara nga pesë shtete pjesëmarrëse, komisioni ka zgjedhur katër projekte nga Kosova, dy nga Shqipëria, dy nga Bullgaria, një nga Maqedonia e Veriut dhe një nga Mali i Zi. Programi përfshin katër filma artistikë, tri projekte hibride, dy dokumentarë dhe një animacion, në faza të ndryshme zhvillimi — gjysma janë në fazën e zhvillimit, ndërsa të tjerat në para-produksion, produksion ose post-produksion.

Bashkëdrejtuesi i Forumit, Eroll Bilibani, ka vlerësuar se komisioni “nuk e pati aspak të lehtë këtë vit”. “Morëm 48 aplikime dhe niveli ishte i lartë në të gjitha aspektet. Ajo që e bën veçanërisht interesante përzgjedhjen finale nuk është vetëm cilësia, por edhe shumëllojshmëria e zërave, vendeve, formave dhe temave,” ka thënë ai, duke njoftuar edhe zgjerimin e ri gjeografik të Forumit.

Para mbërritjes në Prizren, ekipet do të marrin pjesë në dy takime përgatitore online më 28 dhe 30 korrik, të udhëhequra nga mentori kryesor Martijn te Pas nga “euROPE doconsultancy”. Këto sesione do të prezantojnë strukturën e Forumit, do t’i ndihmojnë ekipet të përgatisin prezantimet dhe do të ofrojnë komentet e para mbi qartësinë, nevojat e projekteve dhe mënyrën e komunikimit.

Gjatë festivalit, nga 9 deri më 12 gusht, kineastët do të marrin pjesë në sesione trajnimi në grup dhe individuale, përgatitje projekte, diskutime artistike dhe profesionale, strategji takimesh, si dhe sesione të mbyllura me qendra kinematografike dhe financues. Do të ketë edhe një “DokuTalk” publik mbi qarkullimin e filmave të shkurtër përmes komunikimit, bashkëprodhimit dhe rrjeteve të industrisë. Sesioni publik i pitching-ut do të zhvillohet më 12 gusht, ku do të shpallen çmimet financiare dhe profesionale.

Kosova përfaqësohet me katër projekte: dokumentarin “Për kë bien këmbatat?” të Erlisë Beqirit, filmin hibrid “bitwixt/n’midis” të Dita Xhaferit, animacionin “Cicë!” të Finesa Pejës dhe filmin “Pantallonat e Mia Janë Pantallonat Tuaja” të Durim Klaiqit. Shtetet e tjera pjesëmarrëse: nga Shqipëria vijnë “Korridoret e pritjes” i Adrian Gurit dhe “Silent Return” i Dionis Priftit; nga Maqedonia e Veriut “Karkeleca” i Hanis Bagashov; nga Mali i Zi “Kroz zube Ane i njene mame” i Gjorgje Petroviq; nga Bullgaria dokumentari “Les fissures” i Gogo Vanev dhe “The celebration of letters” i Ilina Perianovas.

Forumi mbështetet nga Ambasada e Suedisë në Prishtinë dhe Ministria e Kulturës, Rinisë dhe Sportit të Kosovës. Ky vit, shteti në fokus është Italia, falë partneritetit me Italian Short Film Center dhe ShorTO Film Market, me synim të nxitur bashkëprodhime ndërkombëtare dhe t’u ofrojë talenteve të reja italiane qasje në një rrjet ndërkombëtar.

*Burim: Koha.net, https://www.koha.net/kulture/forumi-i-filmit-te-shkurter-u-hap-rruge-dhjete-projekteve-filmike-ne-dokufest*

*— Redaksia ZHURMA*