Çfarë duhet të bëjë Alvarez për t'u transferuar te Barcelona?
Barça pret që sulmuesi argjentinas të shprehë publikisht dëshirën për të lënë Atleticon — ndoshta sonte, në ndeshjen kundër Austrisë.
BARCELONË — Barcelona nuk heq dorë nga Julian Alvarez, pavarësisht se Atletico Madridi ka refuzuar radhazi të gjitha ofertat e paraqitura për 26-vjeçarin argjentinas. Drejtuesit katalanas besojnë se transferimi mbetet i realizueshëm, por kërkojnë që vetë sulmuesi të ndërmarrë hapin e radhës.
Sipas Mundo Deportivo, Barça shpreson që Alvarez të shfrytëzojë daljet publike në media gjatë Botërorit — madje sonte, në ndeshjen e Argjentinës kundër Austrisë — për të shprehur dëshirën e tij për të ndryshuar ambient. Nëse lojtari dhe agjenti i tij ushtrojnë këtë presion publik, Atletico do të detyrohej të vlerësonte shitjen.
Megjithatë, mbetet për t'u parë nëse shifra që do të kërkojnë madrilenët do të jetë e përballueshme për Barcelonën — klubi sapo ka shpenzuar rreth 80 milionë euro për sulmuesin anglez Anthony Gordon.
Burim: Klan Kosova
— Redaksia ZHURMA