Celine Dion imiton basistin e Metallica-s gjatë koncertit në Las Vegas

Këngëtarja kanadeze Celine Dion u shfaq në koncertin e grupit Metallica të mbajtur në arenën Sphere në Las Vegas, ku u incizua duke imituar lëvizjet e gishtave të basistit Roberto Trujillo mbi një kitarë bas imagjinare. Videoja e shpërndarë në llogarinë e saj në Instagram mban pamje nga ngjarja ku ajo ndoqi performancën nga një kuti pranë kitaristit Slash dhe anëtarëve të grupit No Doubt.

Siç raportoi Zhurma më 20 tetor 2026, këngëtarja kishte përfunduar serinë e saj të koncerteve në kryeqytetin francez dhe ishte nisur drejt Las Vegasit me djemtë e saj binjakë.

Sipas mediumit USA Today, pamjet e siguruara nga adhuruesit e pranishëm tregojnë artisten kanadeze duke bërë lëvizje sikur tërhiqte fije të padukshme me përqendrim të plotë gjatë lojës së basistit. Artistja, e cila jeton në Las Vegas, nuk ka performuar më në këtë qytet që nga viti 2019, kur përmbylli angazhimin e saj 16-vjeçar në sallën The Colosseum në Caesars Palace. Media amerikane vlerëson se interpretimet e saj të mëparshme e ndryshuan Las Vegasin duke e shndërruar atë në një nga vendet më të kërkuara të muzikës.

Në dhjetor të vitit 2022, Dion njoftoi publikisht se vuante nga sindroma e personit të ngurtë, një çrregullim i rrallë neurologjik që provokon spazma të forta muskulore dhe që bëri që ajo të tërhiqej përkohësisht nga skena. Për shkak të këtyre problemeve shëndetësore u anulua edhe një angazhim i ri i njoftuar më parë në Resorts World për vitin 2021. Megjithatë, ajo u rikthye në skenë duke mbajtur 16 koncerte në La Défense Arena të Parisit nga 12 shtatori deri më 17 tetor.

Sipas një njoftimi të publikuar në faqen e saj zyrtare në internet, Celine Dion ka planifikuar të mbajë edhe dhjetë koncerte të tjera në arenën e Parisit në maj të vitit 2027. Ndonëse spekulimet për një rikthim përfundimtar me koncerte në Las Vegas vazhdojnë të qarkullojnë, deri më tani nuk ka ndonjë konfirmim zyrtar përveç datave të njoftuara për në Francë.