Bytyqi: Buxheti 2027 shton borxhet dhe lë pas investimet kapitale

Deputeti i LSDM-së, Fatmir Bytyqi, gjatë diskutimit për Propozimin e Buxhetit të vitit 2027 në Komisionin e Financave dhe Buxhetit, ka ngritur akuza ndaj ekzekutivit për mungesë transparence dhe përgjegjësie institucionale lidhur me rastin e Bankës Alta. Sipas tij, qeveria kërkon besimin për të menaxhuar mbi 440 miliardë denarë fonde publike, ndërkohë që ndjek të njëjtën logjikë të interesave jotransparente dhe ndikimeve politike.

Bytyqi u shpreh se projektbuxheti vijon një model ekonomik që shterron mundësitë e zhvillimit dhe i lë nevojat e qytetarëve në plan të dytë. Nga shpenzimet totale prej 440.44 miliardë denarësh, 399.62 miliardë janë shpenzime rrjedhëse ndërsa vetëm 40.82 miliardë denarë shkojnë për investime kapitale, duke treguar se rreth 91 për qind e mjeteve shpenzohen për operacione të përditshme.

Deputeti veçoi si shqetësim rritjen e fondeve për interesa me 18.2 për qind, krahasuar me rritjen prej vetëm 1.7 për qind të shpenzimeve kapitale. «Për çdo denar shtesë të planifikuar për investime kapitale, afërsisht pesë e gjysmë denarë shtesë janë planifikuar për interesa», u shpreh ai, duke shtuar se barra e borxhit publik rritet më shpejt se investimet e reja.