BSH: Inflacioni nga nafta dhe qiratë do të jetë kalimtar
Banka e Shqipërisë konfirmon se vala inflacioniste do të jetë kalimtare, pavarësisht rritjes në tremujorin e dytë.
TIRANË — Banka e Shqipërisë konfirmon besimin se vala inflacioniste do të jetë kalimtare. Në raportin e Politikës Monetare për tremujorin e tretë të vitit, theksohet se inflacioni u rrit gjatë tremujorit të dytë në një nivel mesatar prej 3%, nga 2.5% që ishte në tremujorin e parë.
Sipas institucionit, ky ndryshim erdhi kryesisht si pasojë e rritjes së çmimeve të naftës në tregjet botërore, e nxitur nga përshkallëzimi i konfliktit në Lindjen e Mesme, si dhe nga rritja e çmimeve në disa kategori shërbimesh në vend. Mbivlerësimi i Lekut ka vijuar të amortizojë transmetimin e çmimeve të huaja në tregun vendas, ndërsa presionet e brendshme janë ndikuar nga transporti, turizmi dhe kontributi i lartë i qirave.