Lënia e fëmijës në makinë është fatale — trupi i mbinxehet 5 herë më shpejt
Trupi i fëmijës nxehet deri në pesë herë më shpejt se i të rriturve, ndërsa makina në diell kthehet në një furrë brenda pak minutash.
TIRANË — Kreu i Urgjencës Kombëtare, Skënder Brataj, ka paralajmëruar se lënia apo harrimi i fëmijëve brenda automjeteve gjatë temperaturave të larta të verës përbën një rrezik fatal për jetën e tyre. Sipas tij, ky fenomen i rëndë përsëritet çdo vit dhe kërkon kujdes e reflektim maksimal nga të gjithë prindërit.
Brataj shpjegoi se trupi i fëmijëve mbinxehet tre deri në pesë herë më shpejt se ai i të rriturve, duke e bërë çdo minutë të vlefshme. Për vetëm dhjetë minuta, temperatura brenda një makine të mbyllur në diell mund të rritet me dhjetë gradë, duke e shndërruar mjetin në një furrë të vërtetë.
Sipas mjekëve, shumica e këtyre rasteve nuk ndodhin për neglizhencë të qëllimshme, por për shkak të stresit, lodhjes apo mungesës së gjumit që shkaktojnë amnezinë e kujtesës prospective. Ky fenomen bën që truri të veprojë në mënyrë automatike, duke bërë që prindi të harrojë se ka fëmijën mbrapa.
Për to parandaluar këto tragjedi, urgjenca rekomandon vendosjen e një objekti të domosdoshëm, si telefoni, në sediljen e pasme pranë fëmijës ose mbajtjen e një lodre përpara si kujtesë vizuale. Gjithashtu, prindërit nuk duhet t'u lënë çelësat fëmijëve që të mos kyçen gabimisht brenda.
Në rast se shohin një fëmijë të vetëm në një automjet të mbyllur, qytetarët duhet të ndërhyjnë menjëherë duke thyer xhamin. Ky rrezik i nxehtësisë ekstremisht të lartë vlen gjithashtu edhe për kafshët shtëpiake apo personat e moshuar që mund të lihen në makinë.
Burim: Gazeta Tema
— Redaksia ZHURMA