Brajshori: Trendafilova e West kërkuan te qeveritë evropiane kërcënimin e Kosovës

Ish-ambasadori i Kosovës, Muhamet Brajshori, ka pretenduar se presidentja e Dhomave të Specializuara, Ekaterina Trendafilova, dhe kryeprokurorja Kimberley West kanë telefonuar qeveritë e Bashkimit Evropian dhe të Mbretërisë së Bashkuar për t'i kërkuar atyre kërcënimin dhe ushtrimin e presionit ndaj Kosovës lidhur me mandatin e Gjykatës Speciale.

Pretendimet e ish-diplomatit Kosovar vijnë pasi kryeministri i Mbretërisë së Bashkuar, Andy Burnham, i ka dërguar një letër kryeministrit të Kosovës, Albin Kurti, ku i kërkon mbështetjen dhe respektimin e plotë të mandatit të Dhomave të Specializuara të Kosovës.

Në një postim të bërë në platformën X, Brajshori ka treguar se gjatë vizitave që ka zhvilluar javën e kaluar në disa nga kryeqytetet evropiane ka mësuar për këto kontakte të vazhdueshme të krerëve të Speciales. Sipas ish-ambasadorit, Trendafilova dhe West kanë kërkuar nga zyrtarët evropianë që ta kërcënojnë Kosovën me bllokim të fondeve financiare, me ndalimin e procesit të anëtarësimit në Bashkimin Evropian, si dhe duke e lënë Kosovën jashtë agjendës së anëtarësimit në Këshillin e Evropës, aq kohë sa vazhdojnë procedurat gjyqësore në Gjykatën Speciale. Me këto veprime, sipas tij, synohet që Kosova të parandalohet nga votimi sërish i ligjit për Dhomat e Specializuara.

Brajshori ka deklaruar gjithashtu se letra e kryeministrit britanik dërguar Albin Kurtit është ndikuar drejtpërdrejt nga ambasadori i Mbretërisë së Bashkuar në Kosovë dhe nga telefonatat që Trendafilova e West kanë bërë në Londër. Ai ka pretenduar se argumenti i përdorur nga drejtueset e gjykatës ka qenë se ky institucion është krijuar për të dhënë drejtësi dhe jo për ta vënë në pikëpyetje vetë drejtësinë e tij përmes shqyrtimit të mundshëm nga Gjykata Evropiane për të Drejtat e Njeriut. Ish-ambasadori e ka cilësuar këtë qëndrim si të pazakontë për llogaridhënien gjyqësore, duke theksuar se asnjë gjykatë nuk mund të jetë mbi shqyrtimin.

Sipas Brajshorit, Kosova duhet t'i shpjegojë shqetësimet e saj në mënyrë të drejtpërdrejtë dhe të qartë te partnerët ndërkombëtarë. Ai ka ngritur pyetjen nëse Londra e ka dëgjuar perspektivën e Prishtinës, duke shtuar se Mbretëria e Bashkuar nuk do ta mbështeste një rast të dytë të ngjashëm me atë të «Birmingham Six».