Maqedonci dhe Dusaucy diskutojnë për forcimin e bashkëpunimit ushtarak

Gjatë një takimi zyrtar zhvilluar në Prishtinë, ministri i Mbrojtjes Ejup Maqedonci ka bashkëbiseduar me ambasadorin e ri të Mbretërisë së Belgjikës në Kosovë, Arnaud Dusaucy, në vizitën e tij të parë zyrtare pas marrjes së detyrës. Kreu i mbrojtjes ka shprehur mirënjohjen ndaj shtetit belg për ndihmën e vazhdueshme dhënë vendit, me theks të veçantë në sektorët e sigurisë dhe mbrojtjes.

Sipas njoftimeve zyrtare nga takimi, bisedimet janë përqendruar te intensifikimi i marrëdhënieve dypalëshe në fushën ushtarake. Ndër temat kryesore të shqyrtuara kanë qenë akreditimi i atasheut të mbrojtjes së Kosovës në shtetin belg, si dhe hapat e nevojshëm drejt zbatimit të letërqëllimit të përbashkët lidhur me bashkëpunimin ndërmjet dy palëve.