Çfarë garanton Braho për pasuritë e fituara ligjshëm?
Pse mesazhi i drejtuesit të SPAK vjen pas aksionit kundër një prej grupeve më të mëdha të drogës?
TIRANË — Drejtuesi i SPAK, Klodjan Braho, ka publikuar një mesazh në rrjetet sociale ku sqaron se operacionet e institucionit që ai drejton synojnë vetëm pasuritë me origjinë kriminale. Mesazhi vjen pas një aksioni të fundit që goditi një prej grupeve kriminale më të mëdha të përfshira në trafikun ndërkombëtar të drogës dhe pastrimit të parave.
Braho tha se SPAK vazhdon goditjen e rrjeteve të krimit të organizuar të përfshira në trafikimin e drogës nga Amerika Latine për në Evropë dhe në Mbretërinë e Bashkuar. Ai nënvizoi se veprimtaria e pastrimit të parave dhe pasurive me origjinë kriminale dëmton ekonominë e ligjshme dhe konkurrencën e lirë.
"Ato rrisin forcën ekonomike të krimit të organizuar, përdoren për të financuar veprimtarinë kriminale dhe nuk sjellin asnjë të mirë publike", deklaroi Braho. Sipas tij, pasuritë me origjinë kriminale duhet të sekuestrohen, të konfiskohen dhe të kalojnë në favor të shtetit për qëllime të ligjshme.
Braho garantoi se "në asnjë rast nuk do të cenohen të drejtat e pronësisë dhe të drejtat e tjera reale të personave fizikë dhe juridikë që investojnë mjete monetare dhe pasuri të fituara në mënyrë ligjshme". Mesazhi lexohet si përgjigje ndaj shqetësimeve të ngritura pas aksioneve të fundit të sekuestrimit.
Burim: ATSH
— Redaksia ZHURMA