BQK: Kosova aplikon zyrtarisht për anëtarësim në SEPA

Banka Qendrore e Republikës së Kosovës ka dorëzuar zyrtarisht aplikimin për përfshirje në hapësirën gjeografike të Zonës së Vetme të Pagesave në Euro, duke shënuar një hap të rëndësishëm në procesin e integrimit financiar dhe ekonomik të vendit me Bashkimin Evropian.

Sipas njoftimit zyrtar, ky aplikim vjen pas një procesi disavjeçar të reformave të ndërmarra nga institucioni në kuadër të mandatit të tij dhe të Planit Strategjik 2024-2028. Përgatitja për anëtarësim në këtë zonë pagesash ishte përcaktuar paraprakisht si një ndër objektivat kryesore institucionale të Bankës Qendrore.

Sipas njoftimit të Bankës Qendrore të Kosovës, ky hap pason dorëzimin e paraaplikimit të realizuar në muajin tetor të vitit 2024, i cili kishte shërbyer për fillimin e konsultimeve dhe vlerësimeve paraprake me institucionet përkatëse evropiane. Gjatë kësaj periudhe, institucioni ka vazhduar angazhimin për plotësimin e dokumentacionit dhe përmbushjen e të gjitha kushteve të kërkuara ligjore e rregullative.

Në kuadër të përgatitjeve për këtë proces, sipas të dhënave të publikuara, janë avancuar ndryshimet në Ligjin për Shërbimet e Pagesave, në Ligjin për Bankat, si dhe në legjislacionin që synon parandalimin e pastrimit të parave dhe luftimin e financimit të terrorizmit. Pas miratimit të akteve nga Kuvendi dhe përfundimit të procedurave të tjera ligjore, korniza vendore është përshtatur me standardet e kërkuara evropiane.

Sipas institucionit bankar, përfshirja e vendit në këtë sistem do të mundësojë realizimin e pagesave ndërkufitare në euro në mënyrë më të shpejtë, më efektive, me kosto më të ulëta dhe me kushte më të favorshme për të gjithë qytetarët dhe bizneset. Ky zhvillim vlerësohet si tejet i rëndësishëm për ekonominë vendase, duke marrë parasysh vëllimin e lartë të remitancave dhe lidhjet e ngushta tregtare e financiare me shtetet evropiane.

Procesi i ndërmarrë është zhvilluar përmes një bashkëpunimi të ngushtë ndërinstitucional. Sipas njoftimeve, Banka Qendrore ka bashkëpunuar ngushtë me Kuvendin, me Qeverinë dhe me Ministrinë e Financave, ndërsa ka marrë edhe asistencë teknike nga partnerët ndërkombëtarë, ku veçohet mbështetja e dhënë nga Banka Botërore në modernizimin e infrastrukturës së pagesave.

Nga ana e institucionit bëhet e ditur se dorëzimi i dokumentit nuk nënkupton pranimin automatik në këtë hapësirë pagesash. Aplikimi tashmë ka hyrë zyrtarisht në fazën e shqyrtimit dhe të vlerësimit nga organet përkatëse evropiane, të cilat do të verifikojnë përputhshmërinë e plotë të kornizës ligjore të vendit me rregullat e këtij sistemi financiar.

Në rast se vendimi i organeve evropiane do të jetë pozitiv, atëherë do të pasojnë procedurat e tjera të detyrueshme për pjesëmarrjen e drejtpërdrejtë të institucioneve financiare kosovare në skemat përkatëse të pagesave. Deri atëherë, institucioni ka bërë të ditur se do të vijojë bashkëpunimin e ngushtë me bankat komerciale dhe ofruesit e shërbimeve të pagesave për përgatitjet e mëtejshme teknike e operacionale.

«Dorëzimi i aplikimit përfaqëson një etapë të rëndësishme të reformave të ndërmarra nga BQK-ja në kuadër të mandatit të saj dhe të Planit Strategjik 2024-2028, ku përgatitja për anëtarësim në SEPA është përcaktuar si një nga objektivat institucionale», thuhet në njoftimin e lëshuar për opinionin publik.

«Përfshirja e Kosovës në SEPA do të krijonte mundësi për realizimin e pagesave ndërkufitare në euro në mënyrë më efikase, me kosto më të ulët dhe kushte më të favorshme për qytetarët dhe bizneset», theksohet më tej në njoftimin e bankës qendrore.