Pse u bojkotua furra e një shqiptari në Krushevc?

KRUSHEVC — Qytetarët e Krushevcit në Serbinë qendrore dënojnë thirrjen për bojkotimin e një furre buke në pronësi të një shqiptari, duke theksuar se përkatësia etnike nuk duhet të jetë arsye për diskriminim. Sipas tyre, pronari i furrës është një qytetar i mirë dhe i ndershëm që ka jetuar dhe punuar në Krushevc për dekada, madje para luftës së 1998-1999.

Thirrja për bojkotim u shfaq pasi një poster me përmbajtje fyese dhe diskriminuese u vendos pranë furrës gjatë fundjavës së shkuar. “Kujtojeni Gazimestanin! Mos blini nga ‘shiptari’”, shkruhej në poster. Referenca për Gazimestanin lidhet me 28 qershorin kur Policia e Kosovës ndaloi 37 persona në Gazimestan për brohoritje nacionaliste, nga të cilët 36 u dëbuan nga Kosova për tre vjet. Pas kësaj pati pretendime për keqtrajtim, të cilat po hetohen nga autoritetet kosovare.

“Ç’rëndësi ka përkatësia etnike? E rëndësishme është të jemi njerëz”, thotë Dragana nga Krushevci për Radion Evropa e Lirë. Ajo thekson se e njeh pronarin dhe familjen e tij si “të mirë dhe të ndershme”. “Ata kanë ardhur këtu shumë kohë para luftës. Ne t’i bojkotojmë shqiptarët këtu, ata t’i bojkotojnë serbët në Kosovë… Lëreni popullin të jetojë”, shton ajo.

Lëvizja opozitare e Qytetarëve të Lirë vuri në dukje posterin më 4 korrik, duke paralajmëruar për presion dhe persekutim. Anëtarja e Kuvendit Komunal, Ksenija Bradiq Veloviq, tha se e njoftoi pronarin, i cili nuk ishte i frikësuar. “Familja e tij jeton këtu prej 50 vjetësh. Gjyshi ishte i pari që erdhi”, tha ajo, duke shtuar se nacionalizmi duhet të ndalohet që në fillim, sepse përndjekja e një njeriu nuk i zgjidh problemet e serbëve në Kosovë.

Edhe qytetarë të tjerë e dënuan thirrjen. Bojani e quan “marrëzi” bojkotin e furrës për shkak të një shqiptari. Danijella thotë se “nuk më interesojnë nxitjet e urrejtjes” dhe do të vazhdojë të blejë aty. “Pse duhet të shohim se kush i përket cilit komb? Vetëm provokojnë njerëzit”, shprehet ajo.

Komuna e Krushevcit dënoi më 7 korrik çdo diskriminim, duke theksuar se qyteti është ndërtuar mbi tolerancë dhe veprimet e izoluara nuk e përfaqësojnë atë. Avokati i Popullit i Serbisë, Zoran Pashaliq, kërkoi hetim urgjent nga organet kompetente. Policia dhe Prokuroria nuk iu përgjigjën pyetjeve të Radios Evropa e Lirë. Ky nuk është rasti i parë i presionit ndaj shqiptarëve në Serbi, pasi në shkurt pati tensione edhe në Surdulicë.

Pronari i furrës nuk deshi të komentonte për Radion Evropa e Lirë.

Burim: Lajmi.net, Telegrafi
— Redaksia ZHURMA