Çfarë pengon integrimin e Serbisë në Bashkimin Evropian?
Tetë shtete anëtare u shprehën kundër hapjes së klasterit 3, duke cituar sundimin e ligjit dhe rrezikun e ndikimit rus mbi Serbinë.
BRUKSEL — Tetë shtete anëtare të Bashkimit Evropian janë shprehur kundër hapjes së klasterit 3 në negociatat e anëtarësimit me Serbinë, konfirmuan burime diplomatike për Radion Evropa e Lirë. Kjo bllokadë pengon rrugën e Serbisë drejt integrimit evropian, pasi hapja e kapitujve kërkon pëlqimin unanim të të gjitha vendeve anëtare.
Shqetësimet qëndrojnë në mungesat e Serbisë në sundimin e ligjit, në mosrreshtimin me sanksionet e Bashkimit Evropian ndaj Rusisë, dhe në mungesën e përkushtimit ndaj integrimit evropian. Parlamenti Evropian dënon faktin që Serbia është shndërruar në bazë për aktivitetet e shërbimeve ruse të inteligjencës në Evropë.
Parlamenti Evropian shpreh shqetësim të madh për raporte të besueshme se Serbia është bërë qendër operative për aktivitete hibride e destabilizuese të Rusisë, përfshirë nxitjen e tensioneve etnike e fetare në shtetet anëtare të BE-së. Ai dënon edhe blerjen e raketave balistike kineze CM-400AKG, duke vlerësuar se një armatim i tillë cenon ekuilibrin rajonal të sigurisë.
Disa shtete të tjera anëtare nuk e kanë kundërshtuar hapur hapjen e klasterit, por vlerësojnë se kushtet ende nuk janë përmbushur. Edhe ato kanë ngritur shqetësime për sundimin e ligjit, lirinë e mediave dhe marrëdhëniet e Serbisë me Rusinë.
Komisioni Evropian kishte rekomanduar që Serbisë t'i mundësohej hapja e klasterit 3 gjatë korrikut, por pas diskutimeve mes vendeve anëtare u konstatua se mungon konsensusi i nevojshëm. Hapja apo mbyllja e kapitujve mbetet e mundur vetëm me pëlqimin unanim të të gjitha shteteve anëtare.
Institucionet evropiane synonin që më 14 korrik të mbahej një konferencë ndërqeveritare me Serbinë, ku do të hapej klasteri 3, si pjesë e të ashtuquajturës Super e martë, kur priten konferenca të ngjashme me Malin e Zi, Ukrainën, Moldavinë dhe, nëse plotësohen kushtet, edhe Shqipërinë. Mbetet e paqartë nëse kjo konferencë e pestë do të mbahet.
Toby Vogel, ekspert në Këshillin për Politikat e Demokratizimit, vlerëson se shtetet anëtare kanë vepruar drejt duke mos miratuar hapjen e klasterit, dhe kërkon që BE-ja të mbajë qëndrim më të fortë ndaj presidentit serb Aleksandar Vuçiq. Disa diplomatë besojnë se vende me rezerva mund ta ndryshojnë qëndrimin, pasi druajnë se bllokimi i Serbisë mund të dëmtojë negociatat me Ukrainën.
Burim: Gazeta Dukagjini
— Redaksia ZHURMA