Pse Kos i thekson Maqedonisë se BE-ja nuk jep garanci për anëtarësim?

SHKUP — Eurokomisionerja Marta Kos vizitoi Shkup duke dërguar një mesazh të qartë: Maqedonia e Veriut ndodhet përballë një mundësie historike për t'u afruar me Bashkimin Evropian, por përparimi varet nga përmbushja e detyrimeve, jo nga garanciat.

"Tani kemi një mundësi që ndodh vetëm një herë në një brez," deklaroi Kos. "Ata që i përmbushin detyrimet përparojnë. Ata që nuk i përmbushin mbeten prapa."

Ajo vlerësoi se Maqedonia e Veriut ka shënuar progres të rëndësishëm në zbatimin e reformave brenda Planit të Rritjes për Ballkanin Perëndimor, duke u renditur ndër vendet udhëheqëse të rajonit.

Mali i Zi dhe Shqipëria u përmendën si shembuj të vendeve që po ecin përpara falë zbatimit të reformave. Sipas Kos-it, financimi shtesë i Komisionit Evropian do të orientohet drejt vendeve që arrijnë rezultate më të mira. "Sa më shumë që një vend i përmbush reformat, aq më shumë mbështetje merr," tha ajo.

Qeveria e Maqedonisë së Veriut ka deklaruar se nuk do të pranojë ndryshime kushtetuese pa garanci se ato do të jenë kërkesa e fundit në rrugën drejt BE-së. Por Kos theksoi se nuk ekzistojnë garanci të tilla. "E vërteta është se asnjë vend kandidat nuk ka marrë ndonjëherë garanci se gjatë procesit të anëtarësimit nuk do të paraqiten çështje të tjera deri në ratifikimin e marrëveshjes," nënvizoi ajo.

Eurokomisionerja shtoi se marrëdhëniet e mira fqinjësore janë pjesë përbërëse e besimit mes vendeve kandidate dhe shteteve anëtare. Përmbushja e obligimeve është mënyra më e mirë për të siguruar avancimin në negociata.

Pas miratimit të ndryshimeve kushtetuese, pritet të zhvillohet konferenca e ardhshme ndërqeveritare. "Pas këtij hapi, besoj se Maqedonia e Veriut natyrshëm do t'u bashkohet vendeve udhëheqëse – Malit të Zi, Shqipërisë, Moldavisë dhe Ukrainës," deklaroi Kos.

Burim: Gazeta Metro
— Redaksia ZHURMA