Boçi: PD-ja niset nga decentralizimi, jo nga harta e re e bashkive

TIRANË — Bashkëkryetari i Komisionit të Posaçëm për Reformën Territoriale-Administrative, Luçiano Boçi, tha sot se Partia Demokratike u përfshi në komision për të hartuar një reformë që afron pushtetin vendor me qytetarët dhe përmirëson shërbimet, jo për të ndryshuar thjesht numrin e bashkive.

Sipas Boçit, pjesëmarrja e PD-së lidhej edhe me kërkesat e partnerëve ndërkombëtarë për uljen e tensioneve politike, si dhe me bindjen se reforma duhet miratuar me konsensus të gjerë. Ai tha se puna e komisionit evidentoi shqetësimet e qytetarëve, ndërsa zonat rurale kanë përjetuar shpopullimin më të lartë.

Boçi e cilësoi hartën e propozuar nga mazhoranca "një përsëritje e reformës së vitit 2014", që sipas tij rrezikon të japë të njëjtat pasoja. Ai tha se koncepti i opozitës synon rritjen e funksionalitetit të pushtetit vendor, përmirësimin e përfaqësimit dhe forcimin e autonomisë vendore.

"Në konceptin tonë një reformë territoriale ka për qëllim të rrisë funksionalitetin e pushtetit vendor për t'i shërbyer më mirë qytetarit," tha Boçi, duke shtuar se parimet themelore janë demokracia vendore, autonomia, subsidiariteti dhe zhvillimi.

Boçi tha se qëllimi kryesor i reformës "nuk ka qenë numri i bashkive", por ulja e largësisë së qytetarit nga pushteti vendor, rritja e përfaqësimit, rivendosja e llogaridhënies dhe garantimi i zhvillimit ekonomik të njëtrajtshëm për të gjitha bashkitë.

Ndryshe nga Partia Socialiste, tha ai, PD niset nga decentralizimi i kompetencave dhe financave për të arritur më pas te harta, ndërsa PS u nis nga harta me të njëjtën qasje si në 2014-ën, që dha sipas tij "rezultat katastrofik". Reforma parashikon kthimin e kompetencave, funksioneve dhe burimeve financiare te njësitë vendore.

Sipas Boçit, fushat ku parashikohet rikthimi i kompetencave përfshijnë planifikimin e territorit, furnizimin me ujë e kanalizimet, menaxhimin e mbetjeve dhe rajonalizimin, si element i domosdoshëm i reformës. Projekti, tha ai, respekton Kushtetutën, Kartën Evropiane të Autonomisë Vendore dhe parimin e subsidiaritetit.

Burim: ATSH
— Redaksia ZHURMA