Përparim Rama: VV-ja po bën show politik para Prokurorisë

PRISHTINË — Kryetari i komunës së Prishtinës, Përparim Rama, ka deklaruar se Lëvizja Vetëvendosje po bën një “show politik” para Prokurorisë Speciale, pasi kjo e fundit dorëzoi materiale dhe një denoncim lidhur me kontratat për ndriçimin publik “Smart” në kryeqytet.

Sipas Gëzim Sveçlës nga Lëvizja Vetëvendosje, denoncimi i dorëzuar në Prokurorinë Speciale të Republikës së Kosovës ka të bëjë me dyshime për abuzim dhe dëmtim të buxhetit të Komunës së Prishtinës përmes dy kontratave për ndriçimin publik të nënshkruara në periudha të afërta kohore. Sveçla tha se kontrata e parë është e nënshkruar në korrik të vitit 2024, ndërsa e dyta në prill të vitit 2025, duke shtuar se dallimet e mëdha në çmime për pozicione dhe punë të njëjta ngrenë dyshime serioze që kërkojnë hetime më të thella.

Në reagimin e tij publik, kryetari Përparim Rama ka pyetur votuesit e Lëvizjes Vetëvendosje nëse kjo parti ka dorëzuar ndonjëherë ndonjë propozim në të mirë të qytetarëve në Asamblenë e Kryeqytetit. Për më tepër, Rama ka kritikuar asamblistët e opozitës duke u shprehur se kanë hyrë në asamble për të luajtur hetuesin, prokurorin, gjyqtarin, policin dhe zëdhënësin, ndërsa u bëri thirrje me fjalët: “Punoni, more, najsen!”.

Lëvizja Vetëvendosje pret që Prokuroria Speciale të zbardhë çështjen deri në fund dhe ka theksuar se personat përgjegjës duhet të japin përgjegjësi nëse vërtetohen pretendimet e ngritura se janë lidhur kontrata abuzive që kanë dëmtuar buxhetin e kryeqytetit.