Njazi Ajvazi emërohet konsull në Kopenhagë

Përmes një vendimi të nënshkruar nga zëvendëskryeministri i parë dhe ministri në detyrë i Punëve të Jashtme dhe Diasporës, Glauk Konjufca, ish-anëtari i Kryesisë së Listës Guxo në Mitrovicë, Njazi Ajvazi, ka marrë pozitën e Sekretarit të Dytë në Konsullatën e Republikës së Kosovës në Kopenhagë të Danimarkës. Dokumenti parasheh mandat katërurvjeçar dhe përcakton se ai do të nisë ushtrimin e detyrave më 3 gusht 2026.

Në vendim theksohet: «1. Z. Njazi Ajvazi me gradën funksionale Sekretar i Dytë, caktohet të shërbejë në Konsullatën e Republikës së Kosovës në Kopenhagë, Mbretëria e Danimarkës me mandat katër (4) vjeçar. 2. Z. Njazi Ajvazi fillon realizimin e detyrave dhe obligimeve të tij në Konsullatën e Republikës së Kosovës në Kopenhagë, Mbretëria e Danimarkës, nga data 03.08.2026».

Ajvazi ka qenë aktivist i zellshëm i partisë Guxo në Mitrovicë dhe dikur mbante pozitën e anëtarit të Kryesisë. Ky rast nuk shënon punësimin e tij të parë në këtë ministri, pasi më 30 tetor 2022 ai ishte punësuar atje si zyrtar i shërbimit të jashtëm, në periudhën kur dikasteri drejtohej nga Donika Gërvalla, ndërsa sipas njoftimit për kandidatët fitues ai kishte siguruar pikët më të pakta ndër të pranuarit. Emërimi i tij pason disa vendime të tjera për pozita diplomatike të njerëzve të afërt me pushtetin, ku ndër të tjera përfshihen Rina Dragidella, mbesa e ministrit të Punëve të Brendshme, Xhelal Sveçla, e caktuar Sekretare e Dytë në Uashington, Fitore Dalipi, vajza e axhës së ish-shefit të kabinetit të kryeministrit Luan Dalipi, si dhe Vera Rexhepi Leci, bashkëshortja e bashkëpunëtorit të tij Burim Leci.