Policia: Do t’i kthejmë patentat e mbajtura mbi tetë ditë, por ndalimi mbetet

Policia e Kosovës ka njoftuar se do të nisë kthimin e patentë-shoferëve të cilat janë marrë përkohësisht, në rastet kur ka kaluar afati ligjor prej tetë ditësh për mbajtjen e tyre, sipas njoftimeve të mediave. Ky veprim vjen pas Aktgjykimit të Gjykatës Supreme të Kosovës, të datës 20 tetor 2026, të mbajtur me numrin P.A. nr. 29/2026, të cilin Policia e ka pranuar më 2 nëntor.

Me këtë vendim të Gjykatës Supreme, është shpallur i paligjshëm dhe është shfuqizuar paragrafi 3 i nenit 17 të Udhëzimit Administrativ për Procedurat e Kundërvajtjes, respektivisht Udhëzimit Administrativ (MPB) Nr. 05/2023. Sipas sqarimit të Policisë, ndryshimi ka të bëjë vetëm me mbajtjen fizike të dokumentit, e cila bazuar në nenin 244 të Ligjit për Rregullat e Trafikut Rrugor dhe aktgjykimin e Supremeve, nuk mund të jetë më e gjatë se tetë ditë.

Megjithatë, Policia ka bërë të ditur se ky aktgjykim nuk e ndryshon mundësinë e shqiptimit të masës mbrojtëse të ndalimit të drejtimit të automjetit dhe as nuk i shfuqizon ose anulon masat e shqiptuara më herët. Ato vazhdojnë të mbeten në fuqi deri në përfundimin e afatit të përcaktuar për të cilin janë caktuar.

Sipas Policisë, kthimi i dokumentit nuk nënkupton se shoferët mund të rikthehen në timon. Personat që kanë masë aktive të ndalimit të drejtimit të automjetit dhe drejtojnë automjetin pavarësisht kësaj mase, kryejnë kundërvajtje. Për këtë shkelje, sipas nenit 246 të Ligjit për Rregullat e Trafikut Rrugor, parashihet gjobë prej 500 eurosh, gjashtë muaj ndalim të drejtimit të automjetit, pesë pikë negative dhe konfiskim i përkohshëm i automjetit. Policia ka theksuar se do të vazhdojë kontrollet në trafik dhe verifikimin e masave mbrojtëse, pikëve negative dhe kufizimeve të tjera përmes evidencave përkatëse.