Biznesmeni 61-vjeçar shqiptar humb jetën në Itali

Një ngjarje e rëndë ka tronditur qytetin e Casarano në provincën e Leçes në Itali, ku 61-vjeçari shqiptar Bashkim Rushani ka humbur jetën pasi atij i ra mbi trup një portë e rëndë metalike gjatë kryerjes së punimeve në një pronë private.

Aksidenti fatal ndodhi mëngjesin e 4 nëntorit në zonën Contrada Spagnolo, ndërsa sipas mediave italiane, Rushani ishte pronar i një kompanie ndërtimi dhe po punonte për riparimin e shtyllave të një porte rrëshqitëse, kur struktura u shkëput papritur dhe e zuri poshtë. Pavarësisht ndërhyrjes së shpejtë të ekipeve të emergjencës, ai nuk mundi t'i mbijetonte plagëve, ndërsa në vendngjarje mbërritën karabinierët dhe inspektorët e sigurisë në punë për të nisur hetimet rreth rrethanave të ngjarjes.

Përveç aktivitetit të tij si sipërmarrës në sektorin e ndërtimit për rreth 30 vite, Rushani ishte i diplomuar në Akademinë e Arteve të Bukura në Tiranë dhe ushtronte pasionin për pikturën dhe skulpturën bashkëkohore, duke marrë pjesë në kurse dhe ekspozita, si dhe kishte fituar shtetësinë italiane pas vendosjes së tij në Casarano gjatë valës së emigrimit në vitin 1992 me një nga anijet nga Shqipëria.

Miku i tij, avokati Giovanni Bellisario, u shpreh për TCH: «Jam i tronditur. U njohëm në vitin 1998 dhe na bashkonte pasioni për artin. Kishte një krijimtari të jashtëzakonshme, ishte një artist i gjithanshëm. Humbëm një njeri të mrekullueshëm».

Prokuroria e Leçes ka nisur hetimet për veprën penale të vrasjes nga pakujdesia ndaj personave të panjohur për të përcaktuar përgjegjësitë dhe shkaqet e sakta që çuan në shembjen e portës metalike në pronën private.