Biznesi dhe ligji prin te regjistrimet e studentëve

Agjencia e Statistikave të Kosovës ka publikuar Statistikat e Arsimit të Lartë për fushat e studimit. Sipas të dhënave zyrtare për vitin akademik, fusha e biznesit, administratës dhe ligjit vazhdon të jetë e para në preferencat e studentëve.

Në nivelin Bachelor, kjo fushë ka regjistruar numrin më të lartë të studentëve të rinj, ndërsa numri më i ulët është shënuar në fushën e bujqësisë, pylltarisë, peshkimit dhe veterinarisë. E njëjta tendencë mbizotëron edhe në nivelin Master, ku po e njëjta fushë shënon shifrat më të larta të regjistrimeve të reja, kurse numri më i vogël i takon sërish fushës së bujqësisë, pylltarisë, peshkimit dhe veterinarisë.

Dallimet gjinore shfaqen qartë në fusha të caktuara të nivelit Master. Përkatësisht, në fushën e arsimit pjesëmarrja e femrave është dukshëm më e lartë. Në krahun tjetër, fusha e inxhinierisë, prodhimit dhe ndërtimit paraqet një barazi pothuajse të plotë ndërmjet numrit të femrave dhe meshkujve të regjistruar.