Kosova renditet e katërta në botë në garën ndërkombëtare të robotikës
Ekipi First Kosova shënon sukses të lartë në FIRST Global Challenge 2026 në Kore të Jugut, ndërsa mentorja Elita Hajrizi zgjidhet ndër 10 më të mirët në botë.
Redaksia ZHURMA · · 2 min lexim
Kosova është renditur e katërta në botë në garën ndërkombëtare të robotikës «FIRST Global Challenge 2026», e cila u mbajt në Incheon të Koresë së Jugut. Ekipi First Kosova, i përfaqësuar nga UBT, arriti këtë sukses në mesin e 191 shteteve pjesëmarrëse nga e gjithë bota, duke bashkëpunuar në grup me Greqinë, Poloninë dhe Meksikën.
Gjatë garës, ekipi i Kosovës dëshmoi përgatitje të lartë teknologjike, aftësi në robotikë dhe programim, si dhe arriti deri në fazën e play-off-it. Edicioni i këtij viti kishte në fokus zhvillimin e zgjidhjeve teknologjike për parandalimin dhe menaxhimin e zjarreve të egra përmes robotëve dhe sfidave inxhinierike.
Në kuadër të këtij eventi, mentorja e ekipit First Kosova, Elita Hajrizi, është përzgjedhur ndër 10 mentorët më të mirë në botë. Ky vlerësim erdhi pas një procesi përzgjedhës ku mentorët u ftuan për intervista dhe një juri përzgjodhi dhjetë më të dalluarit për kontributin e tyre në mbështetjen e të rinjve.
Rektori i UBT-së, Prof. Dr. Edmond Hajrizi, e ka vlerësuar lart këtë arritje. «Renditja e ekipit të Kosovës në vendin e katërt në botë është dëshmi e fuqishme e talentit, dijes dhe potencialit inovativ të të rinjve tanë», ka thënë Rektori Hajrizi, duke shtuar se UBT do të vazhdojë të investojë në gjeneratat e reja.
