Bido: Bashkimi me Beratin i sjell Poliçanit më shumë të ardhura

BERAT — Deputeti i Partisë Socialiste, Ardit Bido, tha se bashkimi i Poliçanit dhe Dimalit me bashkinë e Beratit synon "efekt financiar" dhe se qyteti nuk do të humbasë administrimin. Në një lidhje live në emisionin "Now" me Erla Mëhillin në Euronews Albania, ai foli për reformën territoriale që redukton numrin e bashkive nga 61 në 46.

Sipas Bidos, Poliçani do të kthehet në një nëndarje administrative të quajtur "qytet", me një drejtues të dedikuar dhe me përfaqësues në Këshillin Bashkiak të Beratit. Ai theksoi se ky nuk është bashkim i ngjashëm me atë të komunave të vogla të kryer më herët, por një ndarje e re territoriale brenda bashkisë.

Bido shpjegoi se Poliçani, bashkë me dy njësitë e tjera administrative të veta, përfshirë Roshnikun, do të ruajë statusin e qytetit dhe do të ketë numër të caktuar anëtarësh në Këshillin Bashkiak. Sipas tij, bashkitë e vogla nuk kanë mundësi të gjenerojnë vetë të ardhura të mjaftueshme për investime.

Bashkimi me Beratin, tha deputeti, i jep Poliçanit më shumë të ardhura që do të shpenzohen në vetë qytetin, pa humbur shërbimet që merreshin deri më tani në nivel bashkie — tashmë të zëvendësuara nga "qyteti". Qëllimi, sipas tij, është rritja e investimeve që sot bashkia e Poliçanit nuk i përballon dot vetë.

Deputeti komentoi edhe protestat në Poliçan, ku anëtarë të degës së PS-së kanë djegur teserat e partisë pas propozimit për reformën territoriale, ndërsa kryetari i degës ka dhënë dorëheqjen. Bido theksoi se sqarimi i tij synon të tregojë se zona nuk do të humbasë traditën, administrimin apo vendimmarrjen vendore.

Burim: Euronews Albania
— Redaksia ZHURMA