Begaj: Shqipëria synon përfundimin e negociatave në vitin 2027

Presidenti i Republikës, Bajram Begaj, priti të enjten ambasadoren e Delegacionit të Bashkimit Evropian në Shqipëri, Sofia Moreira de Sousa, nga e cila pranoi progres-raportin e Komisionit Evropian për Shqipërinë. Begaj rikonfirmoi se vendi mbetet i përkushtuar për përfundimin e negociatave deri në vitin 2027 dhe synon anëtarësimin e plotë në BE në vitin 2030.

Dorëzimi i dokumentit zyrtar vjen në kuadër të vlerësimit të përvitshëm që Komisioni Evropian bën për ecurinë e reformave dhe plotësimin e standardeve evropiane nga vendet candidate të Ballkanit Perëndimor. Takimi mes kreut të shtetit dhe përfaqësueses së BE-së shënon hapin zyrtar të pranimit të gjetjeve të këtij raporti nga institucioni i Presidencës.

Gjatë bashkëbisedimit me diplomaten evropiane, kreu i shtetit e vlerësoi progres-raportin e këtij viti si një dëshmi të qartë të avancimit të vendit në procesin e integrimit evropian, njoftoi Presidenca. Begaj e cilësoi këtë dokument si një tjetër hap të rëndësishëm drejt objektivit historik të anëtarësimit. Gjithashtu, sipas njoftimeve zyrtare, ai i përcolli me këtë rast ambasadores Moreira de Sousa mirënjohjen ndaj Komisionit Evropian për mbështetjen e vazhdueshme dhe për politikat pro zgjerimit në rajon.

Lidhur me përparësitë e brendshme, Presidenti Begaj theksoi angazhimin e palëkundur të Shqipërisë për forcimin e sundimit të ligjit, lirinë e medias, si dhe për luftën e pandërprerë kundër korrupsionit dhe krimit të organizuar. Kreu i Shtetit nënvizoi se respektimi i sundimit të ligjit, funksionimi normal i institucioneve dhe dialogu demokratik mbeten elemente thelbësore për realizimin e objektivit strategjik të integrimit.

Sa i përket hapave të mëtejshëm në këtë proces, vendi synon mbajtjen e ritmit të reformave për të përmbushur afatet e përcaktuara për mbylljen e kapitujve të negociatave brenda vitit 2027.