Bedri Hamza: Protesta është në përkrahje të ish-krerëve të UÇK-së

Kryetari i PDK-së, Bedri Hamza, së bashku me deputetët e kësaj partie, i janë bashkuar protestës gjithpopullore në mbështetje të Ushtrisë Çlirimtare të Kosovës, të organizuar nga shoqatat e luftës në Prishtinë. Në një prononcim për gazetarë, ai tha se vendimi dënues i Gjykatës Speciale është i papranueshëm dhe i pabazuar në fakte.

Hamza theksoi se kjo protestë nuk është e drejtuar ndaj askujt, por është në përkrahje të plotë për Hashim Thaçin, Kadri Veselin, Jakup Krasniqin dhe Rexhep Selimin. Ai shtoi se do të ndërmerren të gjitha veprimet e nevojshme demokratike dhe ligjore, të cilat do të konkretizohen në Kuvendin e Republikës së Kosovës.

Protesta me moton “Në mbrojtje të UÇK-së” u mbajt dy ditë pas shpalljes së aktgjykimit dënues të shkallës së parë nga Gjykata Speciale në Hagë ndaj ish-krerëve të UÇK-së.