BDI: VLEN u bë instrument i politikave serbe

SHKUP — Bashkimi Demokratik për Integrim (BDI) ka reaguar me akuza të ashpra ndaj koalicionit VLEN, duke pretenduar se pas hyrjes në qeveri ka vepruar në kundërshtim me premtimet e dhëna para zgjedhjeve dhe se u bë instrument i politikave që favorizojnë ndikimin e "botës serbe" në Maqedoninë e Veriut.

Sipas BDI-së, VLEN-i gjatë zgjedhjeve premtoi se nuk do të bëhej pjesë e qeverisë nëse të mungonte edhe një votë për fitore, dhe se do të tërhiqej nga politika. Sot dihet se ndodhi pikërisht e kundërta: si humbës zgjedhor, VLEN-i hyri në qeveri dhe u bë instrument i VMRO-DPMNE-së.

Raporti i Parlamentit Europian konfirmon për dy vite me radhë rritjen e ndikimit të "botës serbe" në Maqedoninë e Veriut dhe apostrofon qartë promovimin e këtyre politikave nga përfaqësues të pushtetit. Këto nuk janë vlerësime të opozitës, por konstatime të institucioneve evropiane. Prandaj, askush nuk mund t'i relativizojë apo t'i shpërfillë këto sinjale alarmi.

BDI përmend rëndësinë e rolit dhe ndikimit politik të Ivan Stoilkoviqit brenda qeverisë, duke përfshirë deklaratat e tij publike se ka "shpëtuar" përfaqësuesit e VLEN-it nga turpi politik, afrimin me strukturat e Milorad Dodikut dhe kontratat në sektorin energjetik me kompani të lidhura me interesat e tij.

Gjithashtu, BDI tregon se zgjerimi i pranisë së kapitalit bankar serb në vend dhe vendimet institucionale që kanë krijuar hapësirë për forcimin e ndikimit serb përbëjnë një mozaik që nuk mund të mohohet. Ky proces vazhdon edhe me gërryerjen sistematike të Marrëveshjes së Ohrit, përmes vendimeve të Gjykatës Kushtetuese.

VLEN-i nuk është spektator në këtë proces, por kamuflues, relativizues dhe bashkërealizues i politikave që cenojnë të drejtat kolektive të shqiptarëve. BDI thotë se qytetarët shqiptarë e dinë kush premtoi një gjë dhe bëri të kundërtën, dhe se verdiktin do ta japin qytetarët. Burim: Shenja
— Redaksia ZHURMA