BDI: Reagim ndaj marrëveshjes për nxënësit në Butel

Bashkimi Demokratik për Integrim ka reaguar ashpër ndaj marrëveshjes së prezantuar nga zëvendësministri i Arsimit, Driton Sulejmani, për nxënësit shqiptarë të Sh.F. “Petar Zdravkovski – Penko” në Butel. Sipas partisë, marrëveshja e arritur ndërmjet Ministrisë së Arsimit dhe Komunës së Butelit parashikon që nxënësit nga Çairi që banojnë pranë shkollës të pranohen në klasat e para vetëm nëse kanë vëlla apo motër që tashmë ndjek mësimin në këtë shkollë, pa parashikuar hapjen e një paraleleje të re në gjuhën shqipe.

BDI vlerëson se ky veprim përbën një zgjidhje diskriminuese, joligjore dhe të kushtëzuar, e cila kufizon të drejtën e fëmijëve shqiptarë për arsim në gjuhën amtare. Partia kërkon nga institucionet që të garantojnë kushte për hapjen e paraleleve në gjuhën shqipe kur ka interesim të mjaftueshëm, në vend të vendosjes së kritereve shtesë dhe përjashtuese.