Pse vetëm një shoqatë shqiptare mori fonde nga 18 mln denarë për marrëdhënie ndëretnike?

SHKUP — Bashkimi Demokratik për Integrim (BDI) ka kritikuar shpërndarjen e 18 milionë denarëve (rreth 300 mijë euro) nga Ministria e Marrëdhënieve Ndërmjet Bashkësive për 36 projekte, duke e cilësuar atë si thellësisht të pabalancuar dhe në kundërshtim me vetë qëllimin e programit. BDI ka theksuar se vetëm një shoqatë shqiptare ka përfituar mbështetje, ndërsa organizatat maqedonase, serbe dhe të komuniteteve të tjera dominojnë listën e përfituesve.

Veçanërisht shqetësues, sipas BDI-së, është fakti se pesë projekte janë ndarë për iniciativa të komunitetit serb, përfshirë shënimin e “110-vjetorit të Kajmakçalanit”. “Bashkësia e Serbëve të Maqedonisë” nga Kumanova ka përfituar tre projekte, ndërsa shoqata “KUD Srpski Vez”, gjithashtu nga Kumanova, ka përfituar dy projekte.

Një numër i konsiderueshëm projektesh të financuara lidhen me fusha si rehabilitimi shëndetësor, lufta kundër varësive, mbështetja e personave me aftësi të kufizuara, digjitalizimi dhe standardet e shërbimeve — tema që, sipas BDI-së, nuk kanë lidhje të drejtpërdrejtë me promovimin e marrëdhënieve ndëretnike, që është vetë qëllimi i programit.

Pothuajse çdo projekt ka marrë rreth 500 mijë denarë, duke sugjeruar një shpërndarje uniforme të fondeve, por jo domosdoshmërisht në përputhje me kriteret e shpallura të Ministrisë. Këto kritere parashikojnë promovimin e karakterit multietnik të shoqërisë, zvogëlimin e distancës etnike, luftimin e diskriminimit, zbatimin e Marrëveshjes Kornizë të Ohrit, respektimin e përdorimit të gjuhëve të komuniteteve dhe mbrojtjen e identitetit kulturor të të gjitha bashkësive.

BDI kërkon publikimin e plotë të procesit të vlerësimit, kritereve sipas të cilave janë përzgjedhur projektet dhe një auditim të pavarur për të verifikuar nëse fondet publike janë ndarë në mënyrë të drejtë, transparente dhe në përputhje me qëllimin për të cilin janë miratuar. “Promovimi i marrëdhënieve ndëretnike nuk mund të realizohet duke lënë në margjina komunitetin shqiptar dhe duke financuar projekte që nuk i shërbejnë bashkëjetesës dhe barazisë. Kjo qasje cenon besimin e qytetarëve në institucione dhe rrezikon të minojë frymën e Marrëveshjes së Ohrit”, tha BDI.

Burim: Telegrafi
— Redaksia ZHURMA