BDI: Qeveria humbi 60.77 milionë euro grant të BE-së për hekurudhën
Mjetet e pakthyeshme ishin të destinuara për ndërtimin e seksionit të tretë të hekurudhës drejt Bullgarisë dhe u humbën nga anulimi i tenderit.
SHKUP — Bashkimi Demokratik për Integrim (BDI) akuzon qeverinë se ka humbur një grant prej 60.77 milionë eurosh nga Bashkimi Evropian. Këto mjete të pakthyeshme ishin të destinuara për ndërtimin e seksionit të tretë të Korridorit Hekurudhor 8 drejt Bullgarisë. BDI e cilëson këtë si dështim serioz për infrastrukturën dhe zhvillimin e ekonomisë.
Në një konferencë për media, Bekim Rexhepi deklaroi se kjo humbje bazohet në dokumentet zyrtare që qeveria i ka dorëzuar Kuvendit. Sipas tij, fondet IPA nuk janë më të disponueshme pasi tenderi i shpallur gjatë vitit 2024 është anuluar dhe kontrata për ndërtimin e hekurudhës nuk u nënshkrua brenda afatit.
Rexhepi rikujtoi se në fund të vitit 2023, kur BDI ishte në qeveri, ishte siguruar një paketë financiare prej rreth 560 milionë eurosh. Ajo përfshinte 175 milionë euro kredi nga Banka Evropiane e Investimeve, 175 milionë euro kredi nga Banka Evropiane për Rindërtim dhe Zhvillim (BERZH), 149 milionë euro grant nga WBIF dhe 60.77 milionë euro grant IPA.
Korridori 8 është pjesë e rrjetit strategjik të Bashkimit Evropian dhe ka rëndësi për NATO-n, sepse lidh Detin Adriatik me Detin e Zi. Sipas BDI-së, vonesat në realizim dhe humbja e fondeve ngrenë pikëpyetje për qasjen e qeverisë ndaj projekteve me orientim euroatlantik.
BDI kërkon sqarime se kush mban përgjegjësi për këtë humbje dhe pse nuk u respektuan afatet. Po ashtu, partia pyet nëse kjo kosto tani do të duhet të financohet nga buxheti i shtetit, duke shtuar se do të vazhdojë ta mbështesë realizimin e Korridorit 8.
Burim: Shenja
— Redaksia ZHURMA