Blerjet mbi 430 milionë euro çojnë FSK-në drejt kapaciteteve të vitit 2028
Qeveria njofton se FSK-ja do të arrijë kapacitetet e planifikuara për vitin 2028 dy vjet më herët, ndërsa investimet në ushtri kalojnë shifrat e deritanishme.
Redaksia ZHURMA · · 1 min lexim
Forca e Sigurisë së Kosovës pritet t’i arrijë dy vjet më herët kapacitetet ushtarake të parashikuara për vitin 2028, sipas njoftimit të lëshuar nga Qeveria e Kosovës. Ekzekutivi ka bërë të ditur se blerjet e armatimit të realizuara tashmë e kalojnë vlerën e 430 milionë eurove, ndërsa synimi i mbetur për mandatin aktual mbetet investimi i mbi 1 miliard eurove në ushtri.
Në kuadër të zhvillimit të FSK-së, mbështetja ajrore mbështetet te dronët Bayraktar dhe SkyDagger, kurse arsenali tokësor përfshin mbi 40 lloje të armatimit të rëndë dhe të lehtë. Krahas kësaj, gjatë mandatit të kaluar buxheti i ushtrisë u trefishua dhe u rekrutuan 3 mijë e 220 ushtarë të rinj, duke e dyfishuar numrin e pjesëtarëve, ndërsa një gjeneratë e re do të nisë trajnimin gjatë këtij viti për të përshpejtuar përmbushjen e objektivave strategjike.
«Ushtria jonë është duke u kompletuar çdo ditë e më shumë, e për këtë ne jemi shumë të vendosur. Synimi ynë është i qartë, t’i dalim zot atdheut e ushtria jonë pjesë e NATO-s», thuhet në njoftimin e Qeverisë.
